Av Laura Djupvik
Å, der er dei,
desse strikkande tanter,
sit på pinnestolar framfor tunge dører
alltid tre av dei om gongen
snart står dei
krokbøygde i eit vegkryss
helsar knapt når du kjem forbi
tviheld i pinnane
i natt ser eg dei på kyrkjegarden
strikkar av same nøstet
flettar saman ei byrjing, feller av ein slutt
dei slektar på urgamle kvinner
ser slikt dei ikkje kan rå med
veit meir enn dei ønskjer å vite
festar tråden med nål
ein stad det gjer vondt
alt som er deg
dei veit og dreg og flikkar
makta kjem derfrå
ein stad
du veit best
du veit kva som er best,
kva du skal bli, kven du vil vere
likevel er der ei anna historie
du enno ikkje kjenner
og denne historia
liknar
deg sjølv
Laura Djupvik er forfattar.
Tekstane er henta frå «Strikkehistorier», eit prosjekt i arbeid.
Diktet er trykt i Syn og Segn 3-2022.
Illustrasjon: Laura Djupvik
