plommetreet ber ikkje frukt
denne hausten
det blømde før frosten i år
du er stadig lang og tynn
under den lause bomullsskjorta
liggande i skuggen av plommetreet
med auga opne og lauvet skjelvande
over deg
handa di i mamma si
ho liknar framleis
på ho med det korte bleika håret
søv mest berre når du søv
*
det er ei stund
før dagsljoset kjem
at hjarta dunkar lett
at det hugsar seg sjølv
at det vrenger seg
opnar seg
du sit i skuffa på ein traktor
med hendene fulle av måling
nei av molter
med sko som kan tola litt myr
med dagen over deg
ein vanleg himmel med skyer og vind
skuggane på marka som eit kart
over landskapet over deg
hugsar du vinden
korleis den børsta deg blank
Ellen Løvhaug Harrison (f. 1994) voks opp i Kabelvåg, har vore student ved Skrivekunstademiet i Hordaland og studerer i dag litteraturvitskap i Bergen. I år debuterer ho som skjønnlitterær forfattar med boka Søv berre når du søv (Det Norske Samlaget 2023)
Foto: Emma Sucalic
Trykt i Syn og Segn 3/2022.
